20220216-17-18施政報告-致謝動議-發言

第四節辯論    持續改善民生、培育人才及青年發展 (18/2)

主席，本節辯論主題包括香港嘅智慧城市建設，智慧城市包括「智慧政府」，但近日有業界人士指出，政府重推公務員「在家工作」，私營業界感覺係變咗「停止工作」，打電話冇人聽，發電郵冇人覆，實體會議開唔到，視像會議亦話冇安排，令到佢哋嘅發展審批申請石沉大海。

我明白喺呢個時刻，抗疫工作應壓倒一切，但唔代表成個政府、各個部門、以至所有公私營嘅發展項目都停晒。之前第一次實施「在家工作」，政府準備不足亦可以理解，但無理由到依家都未做好相關配套。政府要確保有工作需要嘅公務員有完備嘅軟件同硬件，可以喺屋企連接去部門伺服器、能夠攞到相關文件及圖則、同懂得點樣安排視像會議，希望當局從速跟進。本人僅此陳詞。