20220216-17-18施政報告-致謝動議-發言

第三節辯論    經濟新動力：融入國家發展大局 (18/2)

規劃未來-北部都會區

                                           增加房屋及土地供應

主席，早前有跨境司機驗出確診，內地當局收緊文錦渡口岸嘅檢疫同通關安排，影響新鮮蔬菜輸港，菜價隨即飆升。呢件事令我諗起，喺一啲反中亂港分子同外國代理人嘅洗腦宣傳下，香港一度瀰漫強烈嘅反中、仇中情緒，例如講到凡係嚟自內地嘅食品同貨品，都係劣質同唔安全嘅。

有人當時甚至聲稱，只要香港加緊發展本地農業、工業同海水化淡，就唔使再依賴內地進口同飲用東江水，可以自給自足，繼而要求香港獨立。實情係短短幾日嘅通關受阻，已嚴重影響香港嘅經濟民生，呢種香港可以「自給自足」嘅講法，實在係癡人說夢！

亦有人將香港近百年來嘅成功發展史，完全歸功於英國嘅殖民管治同西方制度，忽視香港喺不同發展階段，都相當依賴嚟自內地嘅食品、貨品、人才同技術。內地實施改革開放後，更為香港帶嚟更龐大嘅發展機遇。

隨着西方國家加緊打壓中國，香港作為中國嘅一個特別行政區，喺政治上同經濟上係最好嘅選擇，就係加快融入國家大局，更好地把握國家嘅「雙循環」經濟策略、粵港澳大灣區規劃建設、以及深圳前海嘅擴容提速發展，發揮香港嘅獨特優勢同「近水樓台先得月」嘅地位，讓更多市民分享到國家持續發展帶嚟嘅紅利。

主席，我同建測規園業界，過去就增加土地房屋供應，促進香港嘅城市發展同建設，提出咗大量建議同意見，唔少已獲政府採納，包括活化工廈政策、標準金額補地價、發展祖堂地同綠化帶、善用MiC建造技術，以及今份施政報告提出嘅《北部都會區發展策略》等等，在此我唔一一詳述喇。

政府強調，已覓得足夠用地，滿足未來10年嘅公營房屋需求，但市民嘅處境同感受卻係另一回事。公屋輪候時間不斷增至接近6年，係「三年上樓」目標嘅兩倍。私樓樓價同租金喺疫情下依舊高企，劏房及納米樓湧現，唔少市民、包括專業人士都上唔到車。

過去幾年嘅經驗證明，要加快土地及房屋供應，唔能夠單靠政策口號或政府架構重組，關鍵係簡化與發展相關嘅法規同審批程序。我早喺10年前首次當選議員時已提出，審批程序政出多門、繁複冗長，不但拖慢香港嘅城市建設同土地房屋供應，仲會導致業界出現工時過長、工作量與收費不成正比等問題。政府其後接納咗我哋嘅意見，展開精簡審批流程工作，但整體進度都係慢。

去年施政報告提出擴大簡化改革範圍，包括全面檢視同修訂《城市規劃條例》、《收回土地條例》等法規，方向係正確嘅，相信發展局會積極、有效去做，亦希望業界同市民支持，從速通過修訂建議，適切地簡化審批程序同時間。

主席，正如我喺第二節辯論中指出，良好嘅制度、架構、同程序法規係重要嘅，但人嘅因素同樣不可或缺。必須致力提升各部門同各級公務員嘅工作績效，改變佢哋嘅處事心態。官員除咗擔當「規管者」同「把關者」，亦要有效扮演「促進者」同「促成者」嘅角色。要主動協助發展項目申請人，協調不同政策局與部門，而唔係要申請人自己去「跑部門」、「過五關、斬六將」。

此外，政府每一項政策、措施、工程同研究，都應有客觀、清晰嘅成效指標同落實時間表，務求資源得以善用。仲有係避免將政府與私營業界視為對立同對抗，摒棄將促進私人發展，就等同「官商勾結」、「利益輸送」嘅心態，攜手、共同為香港嘅城市建設同覓地建屋工作而努力。

正如中聯辦主任駱惠寧喺今年嘅新春賀詞指出，香港現有嘅機遇條件，可謂前所未有，但仲要有乘勢而上、穩中求進嘅歷史主動；要落實良政善治嘅願景，仲有一啲制度同機制需要建立，仲有唔少深層次矛盾有待解決；以為可以「躺贏」而懈怠，或是遇到難題就繞道，只會失去奮鬥嘅激情同變革嘅勇氣。

主席，要徹底解決香港面對嘅深層次問題，包括土地房屋問題，告別劏房同籠屋，特區管治團隊必須更加積極作為，亦有賴社會各界嘅共同努力！本人僅此陳詞，支持致謝動議。