20250212有關自動駕駛的4項附屬法例的察悉議案

主席，今日嘅察悉議案，係我向內會主席提出要討論嘅。原因並唔係我對呢4條有關引入自動駕駛設備、尤其係自動泊車系統嘅附屬法例有意見，相反，我係全力支持今次修例工作，並且希望政府做快啲，做多啲。

香港地少人多，車多路窄，泊車位少，駕駛人士唔單止搵位難、泊位難，往往仲會遇到泊好位後落車難、攞車難嘅情況。因為有啲停車場嘅泊位真係設計得非常細同好窄，經常都會泊到車貼車，或者車貼牆。駕駛人士泊好架車，但落車先發現唔夠位開門，幾經辛苦先至勉強出到嚟。對於一啲行動不便嘅長者，甚至高大啲嘅駕駛人士就更困難，一個唔小心仲會撞到、損毀旁邊嘅車輛。

早喺2021年，我已親自拍片講述有關問題，要求政府盡快引入當時已相當成熟嘅各類自動泊車科技，一等就等咗4年，到依家先至逐步落實，而且規定司機唔可以行開，只能喺目視範圍之內使用。我覺得真係做得太慢同太少，同政府聲言要將香港建設成智慧城市嘅目標差距太大。

除咗自動泊車同自動駕駛技術，上個禮拜財委會啱啱討論完嘅智慧交通燈系統，仲有電子交通執法、智慧錶咪、不同類型嘅新能源智慧交通工具等，特區政府推動慢如牛步，令到我同好多議員、駕駛人士及其他道路使用者都感到好失望，呢個正係我要求進行今次辯論嘅主要原因。

運輸署對於創新科技同產品審批緩慢，關卡重重，往往都係以安全做理由，要求業界同相關申請人不停做測試，不斷交文件，幾乎要攞晒世界各地嘅安全認證，先至可以喺香港落地試行。但其實相關科技同產品，可能喺內地或外國早已應用多年，安全表現良好。

然而，對於另一個行車安全問題，署方卻係視而不見，得過且過。喺小組委員會審議期間，我發現原來現行法例對車輛車頭大燈嘅亮度規定，係只設下限，而不設上限嘅。相信唔少駕駛人士都試過，喺馬路遇見迎頭車輛嘅大燈光度過強，可能會影視線同產生危險。我同多位議員都關注有關問題，要求當局解釋同處理，但政府嘅答覆完全係答非所問、敷衍了事嘅，令我相當不滿。

主席，我希望運輸署、運流局，仲有整個特區政府，喺研發及引入各類創新科技同產品方面，要切實咁提速提效，唔能夠再只做「監管者」，而忘記咗擔當「促進者」、「促成者」嘅角色同責任。主席，本人謹此陳詞。