20250402《2024年保護臭氧層(修訂)條例草案》二讀發言

主席，經歷過近年嘅「天鴿」、「山竹」等超強颱風，以及多場百年一遇、以至幾百年一遇嘅特大暴雨，香港市民應該清楚知道，因為溫室效應而引發嘅全球氣候變化，並唔係好似美國總統特朗普所講係一場騙局，而係會隨時隨地殺到埋身，對人命及財產造成嚴重損害嘅人禍。全國各國嘅政府同人民，都有責任採取積極措施，去應對氣候變化，保護地球同人類嘅安全。

本會今日恢復二讀嘅《2024年保護臭氧層(修訂)條例草案》，目的正係落實國際社會為咗緩減溫室效應、以至逆轉氣候變化而制訂嘅《基加利修正案》。《修正案》要求各國因應各自嘅實際情況，盡最大努力去削減18種會導致全球升溫嘅化學物質。而相對於最為人熟悉嘅溫室氣體：二氧化碳，有關化學物對地球臭氧層造成嘅破壞，威力可以係數以千倍，必須加以管制以至禁止。

該等化學物通常係用作冷凍用途，包括用喺雪櫃、冷氣機、仲有滅火劑等，都係市民日常生活近禾必不可少嘅。雖然通過科研以及生產商嘅努力，已經研發出危害性較低嘅替代品，但亦不可能一夜之間全面取締，要市民同商戶立即棄用舊式嘅相關產品。

條例草案嘅主要目的，就係制訂削減使用有關化學物同舊式製冷產品嘅法律框架，以便政府可以分階段去限制佢哋嘅生產、進出口、回收及銷毀，以至最終可以全面取締。對於有關立法同規管原則，我同G19都係認同及支持。

《基加利修正案》早於2016年10月制訂，中央人民政府係喺2021年宣布接受有關內容，並於同年喺內地開始實施，目標係喺2036年或之前，將受管制化學物嘅消耗量，由基線水平削減多達85%。作為雪櫃、冷氣機同多種冷凍裝備嘅生產大國，有關承諾真係唔簡單嘅，充份體現我國就環保減排及應對氣候變化嘅承擔。

喺審議法案期間，我曾經詢問政府，點解香港要等到依家，比內地遲咗3年多先至進行立法。政府解釋，其一係相關諮詢同修例工作，一度受到新冠疫情影響。此外，由於《基加利修正案》對於不同發展程度嘅國家及地區，要求削減嘅幅度同速度會有所不同，因此不能直接同內地嘅做法比較。

講起唔同地區嘅唔同做法，原來美國係喺2022年9 月，先至原則上通過接納《基加利修正案》，比我國遲咗1年多。而且美國國會當時仲附加咗一個條件，就係要求美國國務院尋求將我國由相關嘅發展中國家名單中移除，再次將環保問題政治化。自特朗普上任後，美國更將多項對國際社會作出嘅環保承諾拋諸腦後，對美國國內嘅環保節能政策大開倒車，有關《基加利修正案》嘅落實工作亦接近停頓，對逆轉氣候變化，保護地球同人類安全嘅責任置之不理。

講番本港嘅情況，由於香港本身並無生產有關製冷劑或製冷電器，規管工作主要係針對出入口同回收、銷毀等程序。部分人士關注到，禁止進口使用受規管化學物嘅雪櫃、冷氣機同滅火劑等，會否令到該等產品嘅供應大減，繼而導致價格大幅上升。

當局指出，隨着全球多國陸續落實相關嘅規管，加上已有性價比唔差得太遠嘅替代製冷劑，生產商經已作出調整，因此修例對一般消費者同企業營運成本，應該唔會造成太大影響。對於一啲較難尋找替代品嘅醫學用、科研用嘅冷凍設備，草案亦已經提供咗豁免。

至於修例對冷氣機維修行業嘅影響、相關嘅技工培訓、受規管製冷劑嘅保存、紀錄同強制回收制度等，政府表示會喺下一階段，通過附屬法例方式去落實。我希望政府會汲取今次修訂主體法例嘅經驗，及早展開諮詢同制訂相關指引，確保有關公司同員工能夠適應新法例嘅要求；唔會因為管得太嚴，而令到行業難以生存，或者導致相關維修及回收費用大幅上升；亦唔好因為管得太鬆，而令到有關有害化學物得唔到妥善處理，對環境造成破壞。

最後，講講局長稍後將會動議嘅全體委員會審議階段修正案，基本上只有1條，就係刪除違反備存受管制製冷劑紀錄嘅「持續罪行」，有關問題正係我喺法案委員會提出嘅。

簡而言之，草案規定相關嘅代理商或維修商，必須備存受管制製冷劑嘅存取紀錄，否則即屬違法，最高可判監6個月同罰款20萬元。草案原建議有唔清晰嘅地方，如果有人被裁定冇備存紀錄，我相信佢係好難、以至冇可能喺之後搵番啲紀錄出嚟，變相係必然會持續犯罪。好高興政府聽咗我嘅意見，提出修正案刪除有關「持續罪行」條文，所以我當然會支持，同時亦代表G19支持草案二讀同三讀。本人謹此陳詞。