20250522「積極配合國家以至全球趨勢，研究進行中小學課程架構改革」議案

主席，人工智能嘅發展速度，超越好多人嘅想像；人工智能對人類生活嘅影響，更可以話係無法想像。我哋建測規園業界，好多企業同專業人士都開始應用AI，去協助處理一啲文件工序，例如寫報告、做翻譯，以至一啲簡單嘅設計同繪圖，從而提高工作效率，騰出時間處理專業工作。

喺教育領域，因為涉及大量文字同文件工作，人工智能嘅效用就更大、更明顯。例如過去唔少教師都要花大量時間審閱學生功課、製作教學簡報同影片，以至撰寫向教育局提交嘅各類報告等。依家呢啲工作都可以利用AI協助，讓教師更能專注於課堂教學，以及照顧學生喺成長路途上嘅其他問題。

有人更預計，好快就會出現可完全取代真人教學嘅AI老師，令到好多教育界人士面臨失業。我認為真人教師同學生面對面嘅溝通互動，始終係無可替代嘅。但正如議案指出，現行嘅中小學課程架構，仲有教學模式、師資培訓等等，都有必要進行檢討改革，以適時應對人工智能嘅未來發展。

議案提到嘅人工智能倫理教育，包括私隱安全、版權保護、防範假資訊等，都係非常重要。不過，我想講下AI對學生學習同成長嘅其他影響。

相信唔少人都察覺到，依家新一代嘅畢業生，就算考試成績唔錯，中英文都講得流利，但好多都未必完全有能力親筆書寫，寫中文就錯別字連篇，文法同格式不通，寫英文亦成日串錯字。不過咁亦唔代表佢哋欠缺工作能力，因為有各式各樣嘅軟件程式幫手，以至運用AI去協助佢哋草擬各類文書，甚至可幫埋佢哋引經據典，吟詩作對。

隨着AI嘅效能愈嚟愈強，應用範圍愈嚟愈廣，估計部分我哋過去自己掌握嘅知識同技能極可能會加速倒退。當然，年輕一代亦學會咗好多我哋上一代唔識嘅新技能，但係有一啲最基本嘅知識，包括認識同熟習自己民族嘅文字、文化、歷史等等，係唔應該摒棄嘅，唔應該變成做乜都只能靠上網、靠晒AI去代勞。

AI嘅另一個影響，係人與人之間嘅溝通互動。早喺未有AI之前，單單一部智能手機，已令到好多青少年沉迷玩手機，終日匿埋上網，唔出街，唔運動，嚴重影響佢哋嘅身心發展同溝通能力。AI出現之後，青少年可能會多咗交朋友，不過係虛擬嘅AI朋友，有心事都唔同父母、老師或朋友、同學傾訴，而係會對住部手機或電腦講。

對於以上問題，希望相關嘅AI研發者、教育家、政府官員，以至家長都多加注視。我哋要善用人工智能，充分發揮AI對人類生活同未來發展帶嚟嘅好處，但亦要慎防可能出現、或者已經出現嘅問題同壞影響，搵出應對方法同適當嘅平衡點。主席，本人謹此陳詞，支持議案。