[:zh]《2021年道路交通(修訂)條例草案》二讀發言[:]

[:zh]主席，我發言係支持《2021年道路交通(修訂)條例草案》二讀。草案旨在加強對兩種唔少香港人飼養嘅寵物，即係狗同埋貓嘅保護，規定司機一旦喺駕車期間撞到貓狗，就一定要停車並且報警處理，否則即屬犯罪，最高可被判罰款1萬元及監禁12個月，目的係讓被車傷嘅貓狗可盡早得以救治。

可能好多香港駕車人士都唔知，原來現行法例早已規定，司機喺車到馬、牛、驢、騾、綿羊、豬或山羊時，係必須停車同報警處理嘅。香港近年有愈來愈多流浪牛同野豬出沒，對駕車者造成一定阻礙同危險，但香港絕少、絕少有馬、驢、騾、綿羊同山羊喺馬路出現，大家只會喺馬場同農莊見到佢哋。好明顯，有關法例係源自英國嘅，呢啲動物喺當地通常係有人飼養，作為農業或運輸用途，係頗貴重嘅私人財產，因此需要立法加以規管保護，但係就唔包括貓同狗。

隨着愈嚟愈多香港人飼養貓狗作為寵物，即使冇養寵物嘅市民，對動物權益亦多咗關注，所以對於今次修訂，唔少人都認同係合適及與時並進嘅。但正如草案委員會喺審議時指出，規定駕車者喺車到貓狗時停車，可能會對交通造成一定阻塞，尤其喺高速公路上面，更可能會危害司機本身及其他道路使用者嘅安全。

近年香港就發生過多宗意外，司機同乘客因壞車而喺路中心落車，而不幸被其他車輛撞傷甚或撞死。因此，對於司機、乘客同其他車輛，因為車傷貓狗而需停車處理所衍生嘅安全問題，大家不能掉以輕心。政府喺宣傳有關新法例時，要同時向市民講解相關嘅風險同處理方法。

政府指出，如果司機喺撞到動物後，基於安全理由未能即時停車，可以盡快駛到安全地方後，先至再停車報警。當局又承諾，警方喺接報後，會盡快喺短時間內到達現場，喺一般情況下，司機向警員提供相關資料後就可以駕車離開，毋須扣留車輛或阻礙司機太多時間。呢點對職業司機嚟講係尤其重要嘅，希望政府真係講得出、做得到。

主席，其實我同其他駕車人士一樣，都好唔想車到任何動物，但有時真係避唔到，尤其係較細隻嘅貓狗。所以有啲駕駛者遇到貓狗突然衝出馬路，都未必能夠煞到車或扭軚避開，另外亦擔心咁做會造成更嚴重嘅交通意外。

近年香港嘅路面，除咗多咗豬、牛、同貓狗出現，亦多咗好沙泥、石塊、垃圾、氹仔同路面損壞，仲有唔少我認為並非必要、或者可以加以整合嘅路牌、標記等等，呢啲都會對駕車人士造成困擾同危險。

希望相關嘅政策局及部門，包括食衞局轄下嘅食環署，運房局轄下嘅運輸署、路政署，可以正視有關問題，加強協調合作，唔好話我只負責行人路嘅清潔，啲垃圾落咗馬路、公路就唔關我事，監管工程車、垃圾車，確保佢哋運載嘅物件唔跌落路上，又唔關我事。要切實、有效咁提升路面嘅安全同清潔水平，改善市容，將香港建設成更安全、更美觀、同更宜居嘅城市，希望局長將有關訊息帶畀相關政策局。本人僅此陳詞。[:]