[:zh]《2021年完善選舉制度(綜合修訂)條例草案》全委會階段第三次發言[:]

[:zh]主席，以下我會就幾項草案新訂嘅選舉安排，講講我嘅睇法。為咗全面落實「愛國者治港」原則，草案根據人大決定，設立「香港特別行政區候選人資格審查委員會」，負責審核同裁定特首選舉、選委會選舉同立法會選舉嘅參選人，是否符合擁護《基本法》同效忠香港特區等要求。而資審會嘅決定係不受法律挑戰，避免選舉進程被人透過司法覆核拖延。

草案原建議資審會成員全部由主要官員出任，因應議員意見，政制及內地事務局局長將動議修正案，規定特首須同時委任最少1名、最多3名外界人士進入資審會，港府亦須就資審會嘅組成向中央政府備案，呢啲都係從善如流，進一步完善制度嘅做法。我希望政府日後會研究，係咪應將區議會選舉候選人嘅愛國愛港審查，亦由現時嘅選舉主任轉交畀資審會負責。

此外，根據現行法例同原草案，如果立法會地方選區或功能界別選舉嘅候選人，喺提名期結束後被取消參選資格，有關選舉就要即時終止及重新接受提名。我同多位議員都指出，有關規定畀人有機會透過「博DQ」嚟干擾選舉進行，造成混亂同浪費公帑，甚至阻延新一屆立法會嘅產生。

政府最後採納意見，提出修訂，即使選舉中途有候選人去世或被DQ，選舉將會繼續進行。我係支持有關修正案，並希望當局進一步交代，如果因候選人去世或被DQ，餘下嘅合資格候選人數目等同或少於議席數目，選舉主任係咪可以宣告有關候選人自動當選，毋須進行投票呢？

另外係有關租借處所作為投票站同點票站嘅問題。雖然香港現已黑暴消退，社會恢復穩定，但據聞有啲辦學團體同非政府機構，因為唔滿意新嘅選舉制度，揚言唔會借出設施作為票站。針對有關問題，原草案授權總選舉主任，可指明任何受政府資助嘅學校或機構，借出旗下處所作為票站，如果對方拒絕借出場地，政府可向對方徵收1萬元罰款。

我同唔少議員都指出，有關罰款會否太少，欠缺阻嚇力。政府依家提出修訂，將罰款額提高至5萬元，我認為都係唔夠，點解唔可以強制徵用呢？點解宗教活動處所可獲豁免借場呢？

嚟緊9月嘅選委會選舉，如果有機構無理拒絕借出場地作為票站，令選民未能喺最方便嘅地方，快捷、舒適咁投票，當局就要考慮需否再次修例，加重罰則，甚或授權政府可強制徵用票站，確保12月嘅立法會選舉可順利舉行。本人僅此陳詞。[:]