《2021年業主與租客(綜合)(修訂)條例草案》二讀發言

主席，香港嘅租金同樓價幾乎係全球最貴，公屋輪候時間愈來愈長，導致劏房問題日趨嚴重，估計有超過10萬間，有廿幾萬人住緊。劏房唔止平均呎租貴過豪宅，而且面積細、環境差，衞生及安全欠佳，有啲無良業主更不時以不同形式向租戶濫收費用，無理逼遷時有發生，情況極不理想，根本唔應該喺香港呢個文明、富裕嘅社會發生。

對於以立法方式推行租務管制，我同唔少業界人士都有保留嘅，因為根據海外同本港過去實施租管嘅經驗，規管往往會令租盤減少、業主更加「揀客」、加劇樓宇老化失修，以及林林種種嘅「走法律罅」行為，對於基層弱勢租戶可能弊分分鐘係利少幣多。但由於香港嘅劏房問題實在太嚴重，政府覓地建屋嘅工作又進度緩慢，因此，針對分間單位實施租管，以便爭取更多時間，畀政府去解決相關居住問題，可以話係冇辦法之中嘅辦法，我原則上係唔反對嘅。

然而，正如我喺草案審議期間多次指出，今次嘅立法預期可以產生嘅效用，同部分人士，尤其係劏房及籠屋租戶嘅期望，存在頗大嘅落差。

好多劏房居民都希望，實施租管可以令劏房租金回落，租住權有所保障，居住環境得以改善。但估計因為要保障私人物業產權同平衡公眾利益，草案只係對劏房嘅續租租金加幅、租期、同續租權等作出規管，並冇限制實際嘅租金水平，不設所謂嘅「起始租金」或者「合理市場租值」，亦冇對劏房嘅面積、環境、衞生、安全及維修水平制訂最低標準，令唔少人感到失望，甚至係不滿。

好多人都擔心，部分劏房業主，會趕喺草案正式實施前大幅加租，以抵銷日後法例對加租幅度施加嘅限制，令到冇能力支付高昂租金嘅弱勢租戶，面對更大嘅困難。事實上，根據早前我同一啲劏房戶及關注團體嘅會面，大家擔心嘅情況似乎已經陸續出現緊。

另一個問題係，現時市場上嘅大部分劏房單位，或多或少都涉及違規改建，存在唔同程度嘅樓宇結構、消防安全同公共衞生問題。對於嗰啲工廈劏房、天台屋劏房同貨櫃屋劏房，更加成個單位都係僭建同違反地契，部分更涉及霸佔政府或其他私人業主嘅土地。

唔少市民都要求政府加強執法，加快清拆僭建物同檢控相關業主，藉此提升香港嘅樓宇安全及衞生水平。但唔知係唔係因為政府冇足夠單位去安置受影響人士，亦可能係唔夠人手執法，當局最後決定將各類理應被依法取締嘅違法劏房，統統都納入草案規管範圍，對相關嘅租約同續租權給予法律保障。

呢種做法，講得好聽啲，就係「權宜之計」、暫時性咁「隻眼開、隻眼閉」；講得唔好聽，就係「斬腳趾、避沙蟲」，甚至有人話政府係「自打嘴巴」、「精神分裂」。

將來有關違法劏房嘅租戶，向政府投訴被業主超額加租或無理逼遷，當局應該優先處理有關投訴，確保租戶可以繼續喺違法同有安全風險嘅劏房居住，定係應該先對更根本嘅僭建行為執法呢？

如果係先幫租戶，就變相將僭建問題延續，令到呢啲都市炸藥遲遲未能拆解，亦令到相關違規業主，可以賺取更多不正當嘅租金收入。但如果係先拆僭建，作出投訴嘅租戶就可能因而喪失家園。面對咁嘅情況，啲弱勢劏房租戶又點敢投訴呢？剛剛喺上周發生、奪走多達46條人命嘅台灣高雄舊樓大火，據報裡面亦有唔少違法劏房，港府必須引以為鑑！

草案規定業主須為劏房嘅渠管、窗戶及廚廁爐具等進行保養維修，但未有對相關設施制訂標準。不過，要制訂標準確實係好難嘅，因為可能成條渠、成個廁所廚房、甚至成間屋嘅建造都係違規嘅。將來負責執法嘅差估署同土地審裁處，點樣要求業主做維修保養都係一個難題。

對於劏房嘅最細面積或最低人均居住面積，草案亦係隻字不提，但同時政府又話考慮限制新建住宅單位嘅最細面積，令人摸不着頭腦。就算真係限咗新樓嘅最細面積，但限唔到一個單位最多可住幾多人、幾多戶，咁限制單位面積又有咩用呢？有關建議，同我一直倡議嘅制訂人均居住面積目標，完全係兩回事。

講咗咁多質疑同批評，草案係咪一無是處呢？我嘅結論係，今次立法始終仍有好過冇，尤其係喺禁止業主濫收費用、規定必須簽訂租約，以及兩年加兩年嘅租期與續租權保障，應該可以幫到吓一啲租戶，起碼等令佢哋唔會突然之間畀業主逼遷。不過，我希望草案通過後，政府會盡快制訂相關嘅租約範本，差估署會積極、主動咁，協助劏房租戶爭取佢哋嘅應有權益。

主席，要真正、長遠咁協助劏房戶，方法人人都知，就係大幅同快速咁增加土地房屋供應，令到樓價同租金回落，讓合資格嘅家庭可以加快上樓。今年施政報告提出嘅《北部都會區發展策略》，以及推展中嘅「明日大嶼願景」，方向都係正確嘅，但所需時間太長，冇可能叫啲劏房居民再等十至二十年。 所以，我希望政府把握時間，主動、努力尋找更多方案，加快起多啲公屋同過渡性房屋，同時要精簡法規及審批程序，做好「促成者」嘅角色，集合公私營嘅力量，加快覓地建屋。政府同時要繼續對僭建、霸地，以及無視租客安全嘅無良劏房業主加緊執法，有序取締，真正做到告別劏房。到時，就可以一併告別埋租管，廢除呢條食之無味、但棄之可惜嘅條例草案。本人僅此陳詞。