《2021年強制性公積金計劃(修訂)條例草案》二讀發言

主席，唔知係誤解定係其他原因，我同好多香港市民一樣，對強積金冇乜好感，覺得強積金蝕多賺少，行政費高，透明度低，對提供退休保障幫助有限。雖然強積金公司同積金計劃選擇睇落好多，但基本上都係要逼人投資，逼市民將啲退休金交畀基金經理投資，變得冇乜選擇，而且必須支付行政費用，唔少人感覺費用係相當高，但係就冇最低嘅回報率保證。因此強積金又被部分市民稱為「強迫金」，事實上係強迫嘅，最緊要係可以帶嚟咩好處，甚至有一啲更難聽嘅名稱。

政府近年已推行多方面嘅改革，提升強積金嘅透明度、靈活性同競爭性，藉此降低收費水平同改善整體回報。今日恢復二讀嘅《2021年強制性公積金計劃(修訂)條例草案》，目的係為積金局新設嘅「積金易」電子平台提供法律基礎。該平台有助進一步提高強積金嘅透明度，讓市民可能更簡單快捷咁查閱、比較同轉換不同嘅積金計劃。對於有關措施我係支持嘅，但認為仍然做得唔夠，尤其係喺增加市民選擇方面。政府亦要畀市民感受到，修例可以帶嚟嘅好處。

政府早前表示，正研究喺供款人年滿65歲，即係合資格一筆過提取所有強積金結餘之後，鼓勵佢哋將有關款額，轉為可帶來每月穩定收入嘅年金。政府有關諗法係有其道理同有前瞻性嘅，但好可惜，正如好多其他用意良好嘅政策同建議一樣，特區官員發放嘅訊息含糊不清，畀人歪曲咗又遲遲唔去澄清。就此網上好快就瘋傳，話政府唔止逼市民喺退休前供強積金，連退休後都要逼人購買年金！有人甚至話政府其實係想阻人移民，所以諗方法唔畀市民提取強積金。政府最近已澄清咗，但效果相當一般，仍然有好多人有誤解。

喺「積金易」條例通過之後，我希望政府同積金局會加強宣傳，貼地啲咁，教啲打工仔女如何善用有關平台，積極管理自己嘅強積金戶口，以及認識唔同嘅積金計劃。而除咗近年推出嘅「預設投資策略」，即係收費同風險都較低嘅「懶人」積金計劃之外，係咪仲可以提供其他收費更加低，甚至完全免費嘅供款同投資選擇呢？ 例如有唔少人都提過，可唔可以擺埋喺外匯基金，交畀金管局去投資呢？市民自行購買延期年金、以至國家發行嘅債券，係咪都可視作同供咗強積金呢？局長今日都提出，考慮放寬畀強積金公司投資國債或政策性嘅銀行債券，市民自己購買，唔使畀咁多行政費，又得唔得呢？希望政府認真諗諗，避免強樍金繼續被人污名化。本人僅此陳詞，支持草案二讀同三讀。