第六屆政府架構重組決議案之發言

主席，特首喺去年施政報告提出「三司十五局」架構重組建議，希望加強覓地建屋、文體旅遊、青年發展同「再工業化」等工作，以及理順多個現有政策局同兩個司長辦公室嘅分工，當時我指出有關建議方向正確，值得支持。至於增設副司長嘅建議，我喺多年前已表態支持，希望可以加強香港喺人口政策、大灣區規劃，以及一啲大型發展計劃等嘅統籌、協調同推動工作。

不過，我當時亦指出，唔少市民、包括我代表嘅建測規園界別，擔心政府設立多咗幾個政策局同部門之後，佢哋要走多幾個部門，協調多幾個處，先至取得所需嘅服務同發展審批。唔少人亦質疑，政府嘅架構、人手，仲有行政程序，好似永遠都係有加冇減，絕少主動檢視同精簡，往往有乜嘢做得唔好就加人，但加咗人之後亦唔見得做好咗。

對於今日辯論，相信已融合咗現屆政府同候任特首建議嘅架構重組方案，涉及增加13個問責官員、8個首長級公務員，同49個其他職級嘅職位，每年嘅薪酬及員工開支達1.2億元，唔少市民感覺係「未見其利，先見其害」，質疑政府花大量嘅公帑加人、加位、加程序，一闊三大，係咪真係可以改善到施政、改善到經濟發展、改善到香港市民嘅生活呢？

局長回應嘅時候表示，有關開支其實係投資，強調「工欲善其事、必先利其器」，承諾會喺新架構實施一段時間後作出檢討。我認為除咗檢視新加嘅職位同架構嘅工作成效，亦要睇吓原有嘅架構有咩空間精簡人手、程序，以提升績效。

例如重組後嘅「醫務衞生局」，推行「指定檢疫酒店計劃」設有一個辦事處、「中醫醫院發展計劃」又有一個辦事處，呢啲我認為都係單一同較短期嘅計劃，有冇需要喺局嘅層面花咁多人手同資源呢？重組後嘅發展局要管成9個部門，房屋局就只管1個部門，而且好似只集中睇公營房屋，處理私營房屋嘅問題卻有欠積極。

我亦多次強調，架構、制度係重要嘅，但人嘅因素亦好關鍵。重組之後嘅「民政及青年事務局」，唔再負責文化同體育政策，希望集中做好青年、地區，同文宣、民意方面嘅工作。但唔少人都認為，政府喺呢幾方面，過去做得都係有欠理想，依家改個個名，係咪就會做得好呢？

主席，喺中央支持下，香港過去兩年成功戰勝黑暴，亦完善咗選舉制度，希望隨着今次落實架構重組，新一屆政府、新嘅特首、新嘅管治班子，能夠真正做「以結果為目標」，切實提升香港嘅競爭力同埋治理效能，提速、提效、提量咁覓地建屋，引領香港進入由治及興嘅新時代，確保「一國兩制」實踐行穩致遠。主席，本人謹此陳詞，支持議案。