《2022年職業安全及職業健康法例(雜項修訂)條例草案》三讀發言

主席，仲有約10日就係五一勞動節，經過法案委員會嘅9次會議，合共超過20小時嘅詳細審議，仲有剛才3個多小時嘅辯論，旨在提升工業安全、保障工人健康嘅《2022年職業安全及職業健康法例(雜項修訂)條例草案》，終於進入三讀嘅最後階段。

正如我喺二讀辯論中指出，呢條草案由醞釀、諮詢、到正式提出同審議，喺勞工顧問委員會，以至立法會，都有部分人，包括工商界同勞工界嘅代表，有一定程度嘅唔同意見。有個別嘅黨派同議員，更一度表示會反對部分修例建議以至整條草案。

不過，喺經過大家理性咁討論，坦誠咁協商，勞資雙方互諒互諒，政府亦以從善如流、有錯則改嘅態度，作出咗多項修訂同承諾之後，依家最終提交本會三讀嘅條例草案條文內容，我認為已經平衡同回應到各方嘅利益同關注，整體而言係值得支持嘅。

港澳辦夏寶龍主任講過，唔好以為反對就係民主。縱使對個別條文細節仍未完全滿意，我都希望大家可以支持草案三讀，向社會展示我哋整個立法會，包括不同黨派同勞資雙方，都係一致支持提升香港嘅職業安全同職業健康，努力做到工業零意外，香港人人愛。

最後，我亦希望政府官員明白，立法、檢控、處分，住往係相對簡單同容易嘅，但並非最徹底、有效嘅解決問題方法。對於我同業界提過嘅人手問題、施工期問題、招標制度問題、科技應用等等問題，政府必須認真處理，切實為業界排解憂難，唔係單靠罰人、罰錢就可以了事。本人謹此陳詞。