《2022年職業安全及職業健康法例(雜項修訂)條例草案》修正案第二次發言

主席，以下我會就政府嘅另一批修正案發言，主要針對多類職安健罪行嘅罰則，作出進一步嘅調整。

政府喺草擬條例草案嘅時候，好概括性同機械性咁，將數以百計嘅職安健罪行，簡單分類為好嚴重、嚴重同冇咁嚴重等幾種，然後對相關罰則進行加減。對於好嚴重嘅罪行，一般最高罰則係15萬至20萬、嚴重嘅就罰5萬至10萬、冇咁嚴重嘅就罰1萬至2.5萬元，冇認真咁研究過有關罪行多年來實際發生嘅情況、違法嘅頻率、社會嘅關注、以及部分罪行是否已經過時等等，相關罰則因而出現咗一啲奇怪嘅情況。

例如僱主冇喺工作場所提供足夠嘅照明，原本係最高可罰5萬元，政府最初建議調低至2.5萬元，但係我哋好多同事都唔同意，因為如果係照明度不足，連睇嘢都睇唔清楚，發生意外嘅機會就大大提高，所以政府最終決定維持番原來嘅5萬元罰則。

又例如僱主冇提供足夠嘅飲用水，政府覺得係好嚴重，由最高可罰1萬，大幅提高至10萬。但其實除咗荒山野嶺等好特別嘅場地，一般都唔難買到飲用水，罰10萬似乎係不成比例，政府最終決定改為5萬。

對於最近引起公眾廣泛關注、喺去年奪去多條人命嘅吊重機、起重機、同吊船相關意外，政府唔知點解建議將有關罪行罰則，由原來嘅最高判罰20萬元，改為10萬。多位議員都認為係欠缺理據，依家修正維持番20萬。

此外，對於相同嘅罪行，如果係僱主干犯，罰則一般都係重啲，如果係僱員干犯，罰則就輕啲，一般而言係合理嘅。但對於僱員作出虛假陳述，好可能係呃埋個僱主，例如明明有啲機械冇做好安全檢查，就虛報話已經做咗，有關行為同僱主作出虛假陳述係同樣咁危險，同樣咁嚴重嘅。但政府卻因為干犯者係僱員，就因循咁建議調低罰則，議員同事係難以認同。最後政府亦聽咗意見，維持有關罪行嘅最高罰款，同樣為最嚴重嘅20萬元。

主席，我係非常欣賞局方今次有錯則改，唔會死不認錯嘅態度。希望政府能夠從中汲取經驗，將來唔好重複犯錯，尤其係涉及人命、安全同刑事罪行，絕對不能因循、求其咁處理。

最後，法案委員會喺審議條例草案期間，發現現行嘅職安健法例，存在唔少已過時嘅字眼同條文。例如有關急救箱物料嘅《英國副藥典》，政府現已改稱為《藥學藥典》。我之前亦都發現，原來現行法例有授權署方制訂規則，禁止婦女從事某啲行業同工種，喺依家強調男女平等、婦女撐起半天嘅現今社會，有關條文明顯已不合時宜，甚至有可能違反《性別歧視條例》。

對於上述過時條文，政府未有喺今次修例一併作出修訂，話會喺適當時候再檢討，我希望當局唔係講下就算數，會切實跟進。本人謹此陳詞，支持政府嘅各項修正案。