《2023年印花稅(修訂)條例草案》二讀發言

主席，我發言係支持《2023年印花稅(修訂)條例草案》嘅二讀同三讀。喺本年度預算案公布前，唔少傳媒界人士都問我應唔應該「減辣」或「撤辣」，即係指政府嘅樓市需求管理措施。當時正值香港樓價從高位下調咗超過一成，社會上亦有聲音，包括部分議員同事及地產界嘅朋友，強烈要求政府「撤辣」。但其實當時嘅樓價水平，仍與大部分市民嘅負擔能力頗有距離，加上疫情減退，社會復常在即，我認為政府可以觀察一下再作決定。

其後財爺喺立法會宣讀預算案時，特別重複兩次強調「辣招維持不變」。而隨着恢復通關，旅客重臨，以及美國疑似減慢加息等，本地樓價對比今年初又有所上升。與此同時，財爺喺預算案宣布調整物業交易從價印花稅稅階，以減輕首置人士購買200萬元至1080萬元樓宇，所需繳交嘅稅款，呢個正係我哋依家審議緊嘅草案。政府「減稅但係唔減辣」，有人認為訊息係有啲矛盾同混亂嘅。

財爺解釋，從價印花稅稅階自2010年都冇調整過，今次調整某程度只係追番過去13年嚟嘅通脹率同樓價升幅，主要係希望減輕一般家庭首次置業嘅負擔。呢兩點我係認同嘅，但其實喺調整之後，首置人士最多只會慳到約6萬元稅款。香港好多青年人同年輕家庭「上車」時面臨嘅最大困難，往往係首期要支付嘅金額，而唔係印花稅，今次措施唔係幫唔到幾多。

好多人畀唔起首期，除咗因為樓價高，另一原因係金管局為咗維護銀行體系穩定，而訂下嘅按揭成數限制同壓力測試要求，令到部分有意置業人士借唔到咁多錢，要支付較高成數嘅首期。買新樓就仲好啲，因為發展商可以提供額外借貸同其他協助方案，但買二手樓就冇嘞，有關因素可能就此加劇咗一手同二手樓嘅樓價差距同成交量嘅分別。按揭保險某程度係幫到手嘅，但保費加埋按揭供款就增加唔少負擔。金管局近年已多次放寬有關限制，我希望當局可因應最新嘅本地樓市同外圍息口狀況，再適時作出檢討。

有部分青年人同年輕家庭，覺得好似點樣辛苦、點樣努力都儲唔夠錢畀首期購買私樓，想抽居屋又難過中六合彩，久而久之就會放棄「上車」嘅希望，改為以「上樓」，即係入住出租公屋作為人生嘅最大目標。為咗唔好超出輪候公屋嘅入息同資產限制，部分人刻意不求上進，不爭取升職加薪，甚至寧願「打散」維生。部分人一有餘錢剩，就寧願攞嚟買名牌，或者去旅行，都唔想用嚟儲錢買樓同供樓。根據某啲調查，香港人要唔食唔使超過20年，先足夠支付樓價。

唔好話生兒育女，有啲年輕人因為抽唔中居屋，租唔起私樓，拍拖多年都唔敢結婚，甚至結咗婚，都要繼續分開住喺父媽屋企，直接影響打擊香港嘅低生育率。有關心態同現象，亦削弱咗社會向上流動嘅動力，影響香港嘅長遠發展，加劇咗青年人對政府及社會現狀嘅不滿，降低咗佢哋對香港嘅歸屬感同責任感，形成回歸之後其中一個最嚴重嘅深層次問題。

主席，我喺唔同場合都講過，隨着香港成功止暴制亂，由亂及治，再邁向由治及興嘅新時代；隨着社會同立法會，少咗惡意阻撓政府嘅覓地建屋工作，十年長策嘅公私營房屋供應都可望達標，甚至超標完成，特區政府係時候對香港嘅房屋政策作出全面、深入嘅檢討。

首先係要檢討自亞洲金融風暴之後，政府奉行咗接近20年嘅「重公輕私」房屋政策同建屋目標。隨着公屋平均輪候時間有序回落，公私營房屋嘅七三比例，未來係咪有調整空間呢？佔整體供應達七成嘅公營房屋，係咪應該少啲出租公屋，多啲種類同數量嘅資助出售房屋呢？「三年上樓」承諾係重要嘅，但同時政府係咪應該致力提高港人自置物業比率呢？中央領導叫香港徹底解決住房問題，告別劏房，但政府係唔係只靠起公屋唯獨嘅一招呢？

政府可能會話，如果用多咗土地去起私樓，出租公屋數目又會減少，影響上樓時間。係咪可以採取有效措施，活化二手私樓嘅流轉呢？例如協助解決部分人畀唔起首期，以及借唔足按揭等問題。

政府好多年前推出過首次置業貸款，但當時因為單位供應不足，樓市炒風熾熱，樓價不斷上升，首置貸款變成火上加油，加劇咗樓市泡沫同之後嘅負資產危機。但依家嘅情況完全唔同，係咪可以重新考慮下呢？政府現時財赤嚴重，可能唔會直接咁貸款，但係可以提供擔保，有磚頭作為抵押，風險又係咪能夠接受呢？

按揭供款方面，還款期係咪可以長啲呢？有人或會擔心成世做「樓奴」，但事實係供款人嘅收人一般會隨時間上升，有能力同有上進心，就有機會好快升職加薪，往往少於20年就供完層樓。引入漸進式按揭嘅概念，幫啲青年人同年輕家庭「上車」，可以提供動力，幫佢哋儲錢同促進佢哋向上流動。

我喺11年前首次晉身立法會時，已要求政府制訂兩個指標同目標。第一個係「人均居住面積」，政府開頭連統計數字都冇，之後又話要滿足到「量」嘅需求先，居住質素同面積下一步再講。去年習主席喺「七一講話」都指出，盼望香港人嘅房子可以住得更寬敞一啲。第二個係「住屋開支佔家庭入息比率」，政府依家仍未有任何目標，可能係擔心訂咗都做唔到，咁樣係咪遇難避事，係唔係民有所呼，我有所應呢？

由於今次係稅務修訂，今日代表政府出席會議嘅係財庫局局長，我希望局長你將我嘅意見帶番畀其他局，包括房屋局、發展局，以至係財爺同特首考慮。本人謹此陳詞。