《2022年院舍法例(雜項修訂)條例草案》三讀發言

主席，即將進行三讀嘅《2022年院舍法例(雜項修訂)條例草案》，係喺去年嘅5月25日提交立法會首讀嘅，至今已過咗超過1年。喺一開始審議時，無論喺院舍業界，定係本會嘅議員裡面，都有唔少人質疑，草案內提出嘅人均居住面積要求，以及對院舍嘅人手比例規定，到底係咪切實可行呢？會唔會係變咗好心做壞事，最終導致好多中小型嘅私營院舍，因為符合唔到新法例要求而被迫結業，令到部分院友流離失所，整體嘅宿位供應反而少咗？

經過接近1年時間嘅詳細審議，政府、議員、同業界嘅坦誠溝通，當局對草案內容提出多項修訂，包括押後部分條文嘅實施日期，將部分法定要求同程序清晰化、合理化之後，我覺得經修訂嘅草案內容，整體係值得支持嘅。

不過，草案今日三讀通過，只係一個新嘅開始，未來政府同業界仍有相當多嘅工作要做。第一係對於某啲條件同質素現時可能比較差，但係經營者係好有心做，亦受到唔少長者同家屬歡迎嘅中小型院舍，要積極咁協助佢哋升級轉型，適應新法例嘅要求，而唔係因為佢哋係私營院舍，由得佢哋自生自滅。

第二係要更加積極咁，解決院舍及護理業界嘅人手短缺問題。同其他行業一樣，單靠輸入外勞係難以持續嘅，必須加強培育同留住本地人才，改善佢哋工作環境同待遇，增加培訓及晉升機會。咁先有機會做到習主席提出嘅，讓老人家得到嘅照顧更好一些。本人謹此陳詞，支持本條例草案三讀通過。