20250508《2024年公眾衞生及市政(修訂)條例草案》二讀發言

主席，正所謂「民生無小事」，今日恢復二讀嘅《2024年公眾衞生及市政(修訂)條例草案》，主要係處理7 種民生問題，包括統稱為「公共衞生妨擾事故」嘅樓宇滲水、冷氣機滴水同「垃圾屋」問題，仲有蟲鼠滋生、店舖阻街、雜物霸佔公家地方，以及非法展示或張貼街招海報等。

呢啲民生問題，似乎都唔算好大件事，但係對於受影響嘅居民嚟講，每日都畀有關問題滋擾住、困擾住，對佢哋嘅日常生活、身心健康，以至精神健康，都可能會造成可大可小嘅影響。政府有必要更加積極處理，減少怨氣，提升市民嘅幸福感。

條例草案主要係加強當局對有關問題嘅調查同執法權力，提高罪行罰則同阻嚇力等，希望可以加快處理相關問題，但最終能否達至市民希望見到成果，我認為關鍵之一係相關主事官員同執法人員嘅心態，能否做到真正急市民所急，敢於擔當，善於作為，避免遇難避事，拖得就拖嘅處事作風。

打擊濫用公屋問題就係個好例子，現屆政府推出嘅不少措施都唔需要亦唔涉及修例，只係善用現有嘅權力，相關官員能下定決心做事，自然好快就有成果。

打擊公眾衞生黑點係另一個例子，好多衞生黑點都存在已久，市民多番投訴，都冇見到相關部門能積極處理。今屆政府決心解決有關民生問題，由政務司副司長領導跨部門小組積極處理，加強打擊。兩年過來，原有全港700多個衞生黑點，現已減至約100個，成效顯著。

我建議政府應再進一步，將合適嘅原有衞生黑點加以美化改造，例如加入一啲設計特色，善用網絡攝錄機等科技，去阻嚇非法佔用同棄置垃圾問題，避免故態復萌，同時令市容得以美化，為城市增添色彩。

至於今次修例涉及嘅樓宇滲水同冷氣機滴水問題，其實好多市民都覺得政府多年來都未能有效處理。好多街道同後巷，幾乎日日都有滴水滲水，長年累月，但好似一直都冇人理。有人話可能因為市民見怪不怪，冇去投訴，政府因為冇投訴就唔去積極主動處理，我希望咁樣嘅處事態度唔再存在。

草案建議延長執法人員就滲水、滴水妨擾事故要求入屋調查嘅時段，由現時朝7晚7，擴展至朝7晚10，以提高成功搵到有關源頭住戶嘅機會。但如果負責調查嘅人員得過且得，求其敲下門，冇人應就唔去理，就算延長到24小時都冇用。

主席，雖然我唔係直選議員每日接觸地區居民，但其實我嘅辦事處都接收同處理過好多有關滲水嘅求助個案。有部分滲水辦人員都係好積極咁跟進，但基於一啲內部程序及跨部門嘅協調問題，要圓滿咁處理每一宗個案，往往需要好長嘅時間，令到唔少深受滲水問題困擾嘅市民極度不滿，積累咗大量怨氣。

滲水辦每年開支超過3億元，以政府部門嚟講唔算多，但好多市民都覺得唔值。我多次建議部門採用更多先進儀器，去協助更快咁搵出滲水源頭，然後督促有關業主從速處理，解決問題。

草案建議提高多種公眾衞生相關罪行嘅罰則，但更重要係當局肯積極執法同提出檢控，先至能夠發揮修例嘅成效。如當局認為法庭判罰過輕，亦必須適時、適當跟進，包括提出上訴。

除咗改變官員嘅處事心態，我強調政府仲要做到「兩個善用」，多管齊下去解決公眾衞生問題。

其一係善用創新科技，房屋署已利用網絡攝錄機加上人工智能，去協助調查屋邨高空擲物嘅問題，加強阻嚇力、提高搵出肇事者嘅成功率、減少人手需求以及同住戶出現爭拗嘅機會。食環署近年亦喺多個非法棄置垃圾黑點加裝攝錄機，加埋人工智能幫手，我相信效果會更加好。

政府喺今次修例諮詢，曾建議過以攝錄方式就店鋪阻街行為執法，但考慮咗一啲反對理由，並冇納入為修例建議。反對原因包括有人質疑攝錄執法會侵犯私隱，又或者擔心會變成執法過嚴，影響店舖嘅正常營商。

我認為喺公眾地方從事違法行為，根本就談不上任何私隱。至於執法彈性問題，其實科技亦可幫到手，可以設定合理時限畀商戶正常上落貨，以至喺發出定額罰款告票之後，畀市民同商戶同樣以電子方式提出上訴，唔使一定要親身上庭抗辯。主席，辦法總比問題多，關鍵係政府肯唔肯做，有冇心去做。

第二個善用，係要善用專業物業管理公司同物管從業員。草案提到嘅滲水、滴水、垃圾屋、同雜物霸佔公家地方等問題，第一個收到投訴同去到現場處理嘅，通常都唔一定係政府人員，而係物管公司嘅從業員。

作為「物業管理業監管局」嘅首任主席，以及「香港粵港澳大灣區物業及設施管理聯合會」嘅創會會長，我見證住香港物管業界近年不斷朝向專業化、同智能化發展。無論係大廈管理、維修保養、僭建問題、消防安全、今次修例涉及嘅公眾衞生問題，以至係日常嘅鄰里關係、長者照顧等等，物業管理業界都可以扮演更重要嘅角色。

政府過去對物業管理重視不足，唔少相關嘅立法建議同政策措施，對業界嘅諮詢同支援都好少，更遑論善用佢哋嘅力量同專業。我促請政府改變有關態度，增加對物管工作嘅認知同重視，加強與業界人士及相關團體嘅溝通合作，攜手處理好香港嘅公眾衞生及市政問題，切實咁排解民生憂難。

主席，本人謹此陳詞，支持草案二讀、三讀同各項修正案。