20220216-17-18施政報告-致謝動議-發言

第一節辯論    走出疫境 (16/2)

主席，隨着第五波疫情加劇，單日確診破千，政府再次收緊防疫措施，部分受影響嘅市民開始質疑，香港係咪應該放棄「清零」，改為效法歐美「與病毒共存」呢？

部分國家所謂嘅「與病毒共存」，其實即係「向病毒投降」，可能因為佢哋唔似我哋國家咁，擁有「清零」嘅能力同決心。外國經驗證明，「與病毒共存」或可減少對日常生活嘅限制，但必然會導致感染及死亡人數激增。我認為人命係最可貴、最重要嘅，一宗都係嫌多。

再者，改行「共存」政策，或可爭取與部分海外地區恢復通關，但與內地通關將變得遙遙無期。為咗外防輸入，內地當局更可能進一步收緊兩地嘅貨運安排，到時香港唔單止菜價飆升，其他生活必需品、建築材料等，都可能會大幅漲價同出現短缺，令經濟民生得不償失。

因此，香港必須繼續全力、全民抗疫，而國家將繼續支援我哋，協助香港應對疫情，再次「清零」。在此謹向政府各部門、各層各級，以及各行各業嘅防疫抗疫人員致敬，希望大家繼續共同努力，一定會戰勝疫情。